बैतडी – बैतडीको पाटन नगरपालिका–६ खिपालीमा आज बिहान भएको जिप दुर्घटनामा दुई जनाको मृत्यु भएको छ भने छ जना घाइते भएका छन्।
दुर्घटनामा परी डिलासैनी गाउँपालिका–१ निवासी २४ वर्षीय सन्तोषबहादुर राना (जिप चालक) र ३२ वर्षीय किरण बोहराको घटनास्थलमै मृत्यु भएको जिल्ला प्रहरी कार्यालय बैतडीका प्रवक्ता प्रहरी निरीक्षक बलराम पाण्डेयले जानकारी दिए।
जिपमा सवार अन्य छ जना यात्रु घाइते भएका छन्। घाइतेहरूमा डिलासैनी–१ का ४५ वर्षीय रामकुमार राना, २१ वर्षीया भागरती खत्री, उनकी दुई वर्षीया छोरी एलिसा, २१ वर्षीय हेमन्तप्रसाद भट्ट, २७ वर्षीय राजेन्द्रबहादुर खत्री, र ५१ वर्षीया कमला धामी छन्।
राजेन्द्र र कमलाको अवस्था गम्भीर रहेकाले थप उपचारका लागि धनगढी पठाइएको प्रहरीले जनाएको छ।
धनगढीबाट दार्चुलाको गन्नातर्फ जाँदै गरेको सुदूरपश्चिम प्रदेश ०४–००१ ज १३७२ नम्बरको जिप बिहान करिब ५:३० बजे दुर्घटना भएको हो।
जिप सडकबाट करिब १०० मिटर तल भिरमा खसेको र थामिएको अवस्थामा फेला परेको बैतडी प्रहरी निरीक्षक पाण्डेयले बताए। दुर्घटनाको कारण भने अझै नखुलेको जनाइएको छ।
