कैलाली/ कैलालीमा लागूऔषधसहित चार जना पक्राउ परेका छन्। भारतबाट नेपालतर्फ आउँदै गरेको दुईवटा मोटरसाइकलमा सवार चार जनाको साथबाट लागूऔषध फेला परेको हो।
भजनी नगरपालिका–५, लालबोझीस्थित सीमा क्षेत्रबाट नेपाल प्रवेश गर्दै गरेको से ३ प ९२६३ नम्बरको मोटरसाइकल जाँचका क्रममा भजनी नगरपालिका–४ निवासी २५ वर्षीय मनोज चौधरी र पछाडि सवार २१ वर्षीय बिक्रम चौधरीको साथबाट ३ ग्राम ९६० मिलिग्राम लागूऔषध बरामद गरिएको प्रहरीले जनाएको छ।
त्यस्तै, ग ६ प ८३७९ नम्बरको अर्को मोटरसाइकल जाँच गर्दा घोडाघोडी नगरपालिका–१२ निवासी २१ वर्षीय बिशाल चौधरी र २८ वर्षीय हनुमान चौधरीको साथबाट १ ग्राम ७१० मिलिग्राम लागूऔषध फेला परेको हो।
दुवै मोटरसाइकलसहित चारै जनालाई इलाका प्रहरी कार्यालय पृथ्वीपुर, कैलालीबाट खटिएको प्रहरी टोलीले नियन्त्रणमा लिई आवश्यक अनुसन्धान गरिरहेको छ।
