बैतडी— मंगलवार राति परेको अविरल वर्षासँगै आएको हावाहुरीले बैतडी जिल्लाका विभिन्न स्थानमा मकैबालीमा ठूलो क्षति पुर्याएको छ। विशेषगरी घोगा लाग्न थालेको बेला आएको हावाहुरीले मकै ढल्न पुगेपछि किसानहरू गहिरो चिन्तामा परेका छन्।
सुर्नया गाउँपालिका–८ का ढोले, कठमडा, सेला र दोरा क्षेत्र विशेष रूपमा प्रभावित भएका छन्। स्थानीय बासिन्दा रामबहादुर साउँदका अनुसार उक्त टोलमा एक हजारभन्दा बढी घरधुरी रहेका छन्, र सबैको मकैबालीमा क्षति पुगेको छ।
त्यस्तै, दशरथचन्द नगरपालिका–१ का विभिन्न स्थानहरूमा पनि हावाहुरी र वर्षाको असर परेको छ। मुख्य खाद्यबालीको रूपमा रहेको मकैमा यस्तो समयमा क्षति पुग्नुले आगामी उत्पादनमा नकारात्मक असर पर्ने अनुमान गरिएको छ।
हाल बैतडी जिल्लामा झण्डै १३ हजार हेक्टर क्षेत्रफलमा मकै खेती हुँदै आएको छ। तर पछिल्ला वर्षहरूमा जंगली जनावर, हावाहुरी, रोग तथा किराको कारणले मकै उत्पादनमा गिरावट आएको किसानहरूको गुनासो छ। मेहनतअनुसार उत्पादन नहुँदा किसानहरू मकै खेतीप्रति नै निरुत्साहित हुन थालेका छन्।
