डोटी, असार १२ — सुदूरपश्चिम प्रदेशको डोटी जिल्ला ‘पूर्ण खोप सुनिश्चितता तथा दिगोपना’ हासिल गर्ने प्रदेशकै पहिलो जिल्ला बनेको छ। “स्थानीय स्थायित्व र सहभागिता, पूर्ण खोप सुनिश्चितता हाम्रो प्रतिबद्धता” भन्ने नाराका साथ बिहीबार एक विशेष समारोहका बीच यो ऐतिहासिक उपलब्धि सार्वजनिक गरिएको हो।
सिलगढीमा आयोजित औपचारिक कार्यक्रममा स्वास्थ्य निर्देशनालय राजपुरका निर्देशक डा. खगेन्द्र बहादुर बमले डोटीलाई ‘पूर्ण खोप सुनिश्चितता तथा दिगोपना’ जिल्ला घोषणा गर्दै प्रमाणपत्र प्रदान गर्नुभयो।
जिल्ला खोप समन्वय समितिका अध्यक्ष तथा जिल्ला समन्वय समितिका प्रमुख लक्ष्मण बहादुर सिंहले स्वास्थ्यकर्मी, स्वयंसेविका, जनप्रतिनिधि, संघसंस्था लगायत सबै सरोकारवालाको योगदानप्रति आभार व्यक्त गर्दै स्वास्थ्य क्षेत्रमा डोटीलाई नमूना जिल्ला बनाउने अठोट व्यक्त गर्नुभयो।
डोटी जिल्ला स्वास्थ्य कार्यालयका प्रमुख रमेश मलासीका अनुसार, जिल्लाका सबै नौ स्थानीय तहमा ५९ महिनामुनिका बालबालिकालाई सरकारले निर्धारण गरेका सबै नियमित खोप लगाइएको छ। सबै पालिकाले यसअघि नै ‘पूर्ण खोप सुनिश्चितता तथा दिगोपना’ घोषणा गरिसकेकाले जिल्लालाई समग्र रूपमा घोषित गरिएको उहाँले जानकारी दिनुभयो।
यसवर्ष शिखर नगरपालिका जेठ २० गते पहिलो पालिका बनेको थियो। त्यसपछि क्रमशः आदर्श गाउँपालिका (जेठ २२), बोगटान फुड्सिल (२३), सायल (२४), बडीकेदार (२९), दिपायल सिलगढी नगरपालिका र जोरायल (३०), केआई सिंह गाउँपालिका (३१) तथा पूर्वीचौकी गाउँपालिका (असार ५) पूर्ण खोप सुनिश्चित पालिकाका रूपमा घोषित भएका थिए।
समारोहमा खोप अभियान सफल बनाउन योगदान दिने सबै नौ पालिकाका एक–एक जना स्वास्थ्यकर्मी, स्वास्थ्य शाखा प्रतिनिधि तथा जिल्ला स्वास्थ्य कार्यालयका कर्मचारीहरूलाई सम्मान गरिएको थियो। साथै, सहकार्य गर्ने संघसंस्थालाई मायाको चिनो प्रदान गरिएको थियो।
