मार्तडी, असार ८
बाजुराको बडिमालिका नगरपालिका–८, गड्खेतका लालबहादुर ऐडी र उनकी श्रीमती बिस्ना देवी ऐडी गाउँमै व्यावसायिक तरकारी खेती गर्दै आत्मनिर्भर बनेका छन्। काठमाडौंको थानकोटबाट झन्डै एक दशक अगाडि तरकारी खेती सुरू गरेका उनीहरूले अहिले गड्खेतमै लोभलाग्दो तरकारी खेती गरिरहेका छन्।

१० रोपनी जमिन भाडामा लिएर खेती गर्दै आएका ४१ वर्षीय लालबहादुर र ३८ वर्षीया बिस्ना देवीले व्यावसायिक खेतीबाट आफ्नो जीवनशैली मात्रै बदल्नु भएको छैन, गाउँका दुई दर्जनभन्दा बढी किसानलाई पनि प्रेरित गर्नुभएको छ।

हिमाल बहुउद्देश्यीय कृषि तथा पशुपक्षी फर्ममार्फत सञ्चालन गरिएको यो खेतीबाट ऐडी दम्पत्तिले गत वर्ष मात्र करिब आठ लाख रुपैयाँ आम्दानी गर्ने लक्ष्य राखेका थिए। अहिले उनीहरू आफ्नै उत्पादनबाट एक छोरालाई जापानमा उच्च अध्ययनका लागि पठाइसकेका छन् भने दुई सन्तानलाई सदरमुकाम मार्तडीमै शिक्षामा संलग्न गराएका छन्।

दैनिक ४२ केजीसम्म तरकारी विद्यालयका दिवा खाजाका लागि मात्रै पठाउने गरेको ऐडी दम्पत्तिले बताए। उनीहरूले उत्पादन गरेका टमाटर, काउली, फुलगोभी, गाजर, चिचिन्डा, काक्रो, भिन्डीजस्ता तरकारी मार्तडी र बाम्का बजारसम्म आपूर्ति गर्दै आइरहेका छन्।

२१ वटा ग्रीनहाउस संरचना निर्माण गरिसकेका उनीहरूले निकट भविष्यमा ५० वटा पुर्‍याउने लक्ष्य राखेका छन्। खेतीमा सहजता ल्याउन हाल दुई जना श्रमिकलाई पनि रोजगार दिइएको छ।

उनीहरूको खेती देखेर अन्य किसानहरू पनि व्यावसायिक कृषि तर्फ आकर्षित हुन थालेका छन्। ऐडीको योगदानलाई उच्च मूल्याङ्कन गर्दै बडिमालिका नगरपालिकाले उत्कृष्ट कृषक घोषणा गरिसकेको छ भने पुरस्कृत गर्ने तयारीसमेत गरिएको छ।

कृषि ज्ञान केन्द्र बाजुराका प्रमुख जसिराम साहनीका अनुसार ऐडी दम्पत्तिको प्रयासले जिल्लामा कृषि क्षेत्रको सम्भावनालाई बल मिलेको छ। केन्द्रमार्फत विभिन्न प्रविधि र अनुदानका कार्यक्रमहरूमार्फत ऐडीलाई निरन्तर सहयोग पुर्‍याइँदै आएको जनाइएको छ।

गाउँमै बसेर आत्मनिर्भर बन्न सकिन्छ भन्ने ज्वलन्त उदाहरण बनेका लालबहादुर र बिस्ना ऐडी दम्पत्तिको कथा अहिले बाजुराभरि प्रेरणाको स्रोत बनेको छ।