कैलाली/कञ्चनपुर दुई जिल्लामा लागूऔषधसहित पाँच जना पक्राउ परेका छन्। कैलालीमा खैरो हेरोइनसहित चार जना र कञ्चनपुरमा चरेशसहित एक जना पक्राउ परेका हुन्।
कैलालीको धनगढी उपमहानगरपालिका–३ लक्ष्मी नर्सरी नजिकबाट गौरीगंगा नगरपालिका–४ का २६ वर्षीय बिजय नेपाली र गौरीगंगा–२ का ३२ वर्षीय अभिशेक हमाललाई खैरो हेरोइनसहित प्रहरीले पक्राउ गरेको छ। प्रहरी चौकी कैलालीगाउँ र अस्थायी प्रहरी पोष्ट चटकपुरबाट संयुक्त रूपमा खटिएको टोलीले उनीहरूलाई ५२० मिलिग्राम लागूऔषधसहित नियन्त्रणमा लिएको हो।
यस्तै, जानकी गाउँपालिका–७ मोतीनगर चोकस्थित सडक खण्डबाट जोशीपुर गाउँपालिका–१ का २३ वर्षीय शिवबहादुर चौधरी र जानकी–७ का ३३ वर्षीय देसराम चौधरीलाई पक्राउ गरिएको छ। इलाका प्रहरी कार्यालय टीकापुरबाट खटिएको प्रहरी टोलीले लागूऔषध बिक्रीवितरण गरिरहेका अवस्थामा उनीहरूलाई १९० मिलिग्राम खैरो हेरोइनसहित पक्राउ गरेको जनाएको छ।
उता, कञ्चनपुरको भीमदत्त नगरपालिका–३ तिलाचौर केदार टोलका ६० वर्षीय राम सिंह साउदको घरमा प्रहरीले शनिबार खानतलासी गर्दा २ किलो १५५ ग्राम लागूऔषध चरेश फेला पारेको छ। साउदलाई जिल्ला प्रहरी कार्यालय कञ्चनपुरबाट खटिएको टोलीले नियन्त्रणमा लिएको हो।
पक्राउ परेका पाँचै जनामाथि लागूऔषधसम्बन्धी कसूरमा थप अनुसन्धान भइरहेको सम्बन्धित प्रहरी कार्यालयहरूले जानकारी दिएका छन्।
