कैलाली — भारतबाट फर्किएका तीन नेपालीमा कोरोना संक्रमण पुष्टि भएको छ। सुदूरपश्चिम प्रदेशको गौरीफन्टा नाकामा गरिएको परीक्षणमा ती व्यक्तिमा संक्रमण देखिएको प्रादेशिक स्वास्थ्य निर्देशनालयले जनाएको छ।
पछिल्लो २४ घण्टामा नाकामा गरिएको परीक्षणमा ३१ जना शंकास्पद व्यक्तिको नमुना परीक्षण गरिएको थियो। भारतमा कोरोना संक्रमण दर फेरि बढ्दै गएकाले त्यसको प्रभाव नेपाली सीमावर्ती क्षेत्रमा पनि देखिन थालेको छ।
स्थिति गम्भीर हुनसक्ने भन्दै गौरीफन्टा, गड्डाचौकी, पुलघाट र झुलाघाट नाकामा हेल्थ डेस्कहरू स्थापना गरिएको निर्देशनालयका भेक्टर कन्ट्रोल सुपरभाइजर अधिकृत हेमराज जोशीले जानकारी दिए। उनका अनुसार नाकाहरूमा ३५० थान परीक्षण किट पठाइएको छ।
जोशीका अनुसार, जेठ २१ गतेदेखि हालसम्म सुदूरपश्चिम प्रदेशमा १९ जनामा कोरोना संक्रमण पुष्टि भएको छ। तीमध्ये ८ जना संक्रमणमुक्त भइसकेका छन्।
