कञ्चनपुर, जेठ १८ – एक वर्षदेखि कैलाली र कञ्चनपुरका किसानहरूलाई पावर टिलर दिने भन्दै रकम संकलन गरेर ठगी गरेको आरोपमा सुरो नेपालकी अध्यक्ष सुशिला खड्का ओझा पक्राउ परेकी छन्।

उनसँगै धनगढीको बंग्रा घर भएकी सुनिता चौधरी पनि पक्राउ परेकी छन्। उनीहरू दुवैजना पावर टिलर वितरणको नाममा किसानबाट रकम असुलेर ठगी गर्ने समूहमा संलग्न रहेको आरोप लागेको छ।

जिल्ला प्रहरी कार्यालय कञ्चनपुरका प्रहरी नायव उपरीक्षक (डीएसपी) सागर बोहराका अनुसार, कृष्णपुर नगरपालिकाका किसानहरूले दिएको उजुरीका आधारमा उनीहरूलाई काठमाडौंबाट शनिबार पक्राउ गरी कञ्चनपुर ल्याइएको हो।

प्रहरीका अनुसार खड्काको समूहले विभिन्न व्यक्ति, समूह र सहकारी संस्थामार्फत प्रति किसान ५० हजारदेखि एक लाख ३० हजार रुपैयाँसम्म असुलेका थिए। हालसम्म हजारौं किसानबाट रकम उठाइएको भए पनि कुनै पनि किसानलाई पावर टिलर नदिइएको खुलेको छ।