बैतडी /बैतडी सदरमुकाम खलङ्गा गढी क्षेत्र फेरि पनि भूकम्पको झट्काले हल्लिएको छ। शुक्रबार राति १:४८ बजे गएको ५.१ रिक्टर स्केलको भूकम्पपछि ३.७ रिक्टरको अर्को पराकम्पन र त्यसपछिका दस वटा साना पराकम्पनले बैतडी र आसपासका क्षेत्र फेरि एकचोटि भूकम्पीय जोखिमको सन्देश दिएका छन्।

सुर्खेतस्थित भूकम्प मापन केन्द्रका प्रमुख चिन्तन तिमिल्सिनाका अनुसार, भूकम्पपछि लगातार आएका पराकम्पनहरूले पश्चिम नेपाल अझै जोखिममा रहेको पुष्टि गर्छ। भूकम्पले कुनै मानवीय वा भौतिक क्षति नपुर्‍याएको भए पनि, संरचनात्मक हिसाबले बैतडी अझै सुरक्षित बन्न सकेको छैन।

भूकम्पपछि बैतडीका प्रमुख जिल्ला अधिकारी दीर्घराज उपाध्यायको नेतृत्वमा सदरमुकाम आसपासका भौतिक संरचनाहरूको स्थलगत निरीक्षण गरिएको छ। निरीक्षणमा देखा परेको तथ्यले देखाउँछ कि अधिकांश संरचना भूकम्प प्रतिरोधी मापदण्डअनुसार बनेका छैनन्।

शहरका प्रमुख क्षेत्र गोठालापानीदेखि शाहीलेक हुँदै गढीसम्मका करिब १,००० भन्दा बढी पक्की घरमध्ये ८० प्रतिशत नक्सा पास नगरी निर्माण गरिएका छन्। नगरपालिकाको नियमन कमजोरीले गर्दा जोखिम अझै बढेको छ।

२०७२ सालको विनाशकारी भूकम्पपछि अनिवार्य नक्सा पासको नीति ल्याइए पनि कार्यान्वयन शून्यजस्तै छ। घरहरू नगरपालिका जग्गा र बाटो मिचेर निर्माण भइरहेका छन् भने, जनप्रतिनिधिहरूको ध्यान अझै पनि सतही स्तरमै सीमित देखिन्छ।

प्रत्येक वर्ष भूकम्प दिवस मनाइन्छ, चेतना फैलाउने कार्यक्रम गरिन्छ तर व्यवहारमा सुरक्षित संरचना निर्माण गर्न सकिएको छैन। यो असफलता भोलिको ठूलो विनाशको कारक बन्न सक्नेछ।