बडीमालिका (बाजुरा), जेठ ९ गते।
बाजुराको जगन्नाथ गाउँपालिका–३ स्थित बेर्मा बजारमा रहेको एक होटलमा पानी छोएको निहुँमा दलित समुदायका तीन बालबालिकामाथि कुटपिट गरिएको घटना सार्वजनिक भएको छ। बिहीबार दिउँसो होटल सञ्चालक बाँचा भण्डारीले प्रेम विक, अर्जुन विक र पवन विकलाई जातीय अपमानका शब्दसहित गालीगलौज गर्दै निर्घात कुटपिट गरेको पीडितले बताएका छन्।

पीडित प्रेम विकका अनुसार, होटलमा सामान्य रूपमा पानी छोएको मात्रै थियो। तर त्यसैलाई जातीय घृणाको रूपमा लिएर होटल सञ्चालिकाले आक्रोश प्रकट गर्दै बालबालिकालाई शारीरिक रूपमा आक्रमण गरिन्।

ईलाका प्रहरी कार्यालयका प्रहरी सहायक निरीक्षक रमेश रावलले घटनाबारे जानकारी दिँदै बालबालिकाले पानी पिएको र साहुनीको छोरीलाई जिस्काएको भन्ने प्रारम्भिक जानकारी आएको बताए। तर वास्तविकता बुझ्न दुबै पक्षलाई जुड्डी प्रहरी चौकीमा छलफलका लागि बोलाइएको जानकारी गराए।

प्रत्यक्षदर्शीहरूका अनुसार घटनामा स्पष्ट रूपमा जातीय विभेद झल्किने व्यवहार देखिएको छ। प्रहरीले घटनाको सत्यतथ्य बुझ्न अनुसन्धान सुरु गरेको जनाएको छ।
उता, बाँचा भण्डारीसँग सम्पर्क गर्न खोज्दा उनको फोन नउठेको बताइएको छ।

पीडित पक्षद्वारा दर्ता गरिएको उजुरीमा भण्डारीले ‘शरीरमा झुण्डिएर कुटपिट गरेको’ उल्लेख गरिएको छ।

नेपालको जातीय तथा अन्य सामाजिक छुवाछूत र भेदभाव (कसुर र सजाय) ऐन २०६८ र सो सम्बन्धित नियमावली २०७४ अनुसार, धर्म, संस्कृति वा परम्पराको नाममा कुनै पनि व्यक्तिलाई जात, वर्ग, वंश, पेशा वा शारीरिक अवस्थाको आधारमा भेदभाव गर्न नपाइने स्पष्ट व्यवस्था गरिएको छ।