बाजुरा, जेठ ५ – लामो समयदेखि परेको खडेरीसँगै प्रमुख जलस्रोतहरू सुकेपछि बाजुराको सदरमुकाम मार्तडीमा खानेपानीको चरम अभाव देखिएको छ। दैनिक उपभोगका लागि आवश्यक पानीसमेत नपाउँदा स्थानीयवासीहरू टिन, जर्किन र गाग्री बोकेर टाढाटाढाबाट पानी ल्याउन बाध्य छन्।

स्थानीयवासी जस बहादुर विकका अनुसार, करिब एक महिनादेखि पानीको आपूर्ति अत्यन्त न्यून छ। “हरेक वर्ष चैतदेखि जेठसम्म पानीको समस्या दोहोरिन्छ, तर समाधान भने कहिल्यै हुँदैन,” विकले गुनासो गरे।

समस्या दीर्घकालीन हुँदै जाँदा उपभोक्ता समिति र बडीमालिका नगरपालिकाबीच समन्वयको अभाव देखिएको भन्दै स्थानीयवासीहरू आक्रोशित भएका छन्। बृहत खानेपानी तथा सरसफाइ उपभोक्ता समिति र नगरपालिकाको समन्वय कमजोर हुँदा संकट वर्षेनि दोहोरिएको हो।

यता नगरपालिकाका प्रमुख प्रशासकीय अधिकृत पदमबहादुर माझीले भने समस्या समाधानका लागि डिभिजन खानेपानी कार्यालयसँग सहकार्य गर्दै प्राविधिक टोली खटाइएको जानकारी दिनुभयो। “यसै आर्थिक वर्षभित्र बजार क्षेत्रमा शुद्ध पानी पुर्‍याउने लक्ष्यसहित काम अघि बढाइएको छ,” उहाँले बताए।

मार्तडी बृहत खानेपानी कार्यालयका व्यवस्थापक कर्णबहादुर रावलका अनुसार, हाल करिब ६ सय घरधुरीमा रहेका धारामा दिनको एकपटक मात्र एक घण्टा पानी प्रवाह भइरहेको छ। तर आगामी महिनाभित्र डोटी डिभिजन खानेपानी कार्यालयको ५० लाख रुपैयाँ सहयोगमा झाल्ले नौलाबनबाट पानी आपूर्ति गर्ने योजना अन्तिम चरणमा पुगेको जानकारी दिनुभयो।

रावलका अनुसार करिब साढे दुई किलोमिटर पाइपलाइन बिछ्याइएको छ भने आधुनिक मिटर प्रणालीमार्फत नियमित आपूर्ति सुरु गर्ने तयारी भइरहेको छ।

तर तत्कालका लागि भम्क, थापाबाडा, पानीपाल, बाउलीलगायत बजार क्षेत्रका बासिन्दा भने पानीको खोजीमा दिनहुँजसो दुरी तय गर्न बाध्य छन्। खानेपानीको यो समस्याले स्वास्थ्य, सरसफाइ र जनजीवनमा गम्भीर असर पार्न थालेको स्थानीयहरू बताउँछन्।