डोटी, असार १७
दिपायल सिलगढी नगरपालिका–६ ले डोटी सदरमुकाम सिलगढीस्थित पद्म पब्लिक मुक्ति नारायण माध्यमिक विद्यालयलाई करिब ५० हजार रुपैयाँ बराबरका खेल सामग्री हस्तान्तरण गरेको छ।
आर्थिक वर्ष २०८२/८३ को स्वीकृत कार्यक्रमअन्तर्गत वडा अध्यक्ष नरेश मलासीसहितको टोलीले विद्यालयमै पुगेर प्रधानाध्यापक केशवराज ओझालाई क्रिकेट, भलिबल र फुटबललगायतका खेल सामग्री हस्तान्तरण गरेको हो।
वडा सचिव हरिसुन्दर श्रेष्ठका अनुसार वितरण गरिएका सामग्रीमा क्रिकेट खेलका लागि हेल्मेट, ग्लोभ्स, ब्याटिङ प्याडलगायतका आवश्यक सामग्रीसमेत समावेश छन्। वडा अध्यक्ष मलासीले विद्यालयकी विद्यार्थी क्याप्टेन मनिषा डौडीलाई ती सामग्री प्रयोग गर्ने तरिकासमेत देखाएका थिए।
कार्यक्रमलाई सम्बोधन गर्दै वडा अध्यक्ष मलासीले विद्यार्थीहरूले अनुशासित भएर खेलकुदमा सहभागी हुन, लागूऔषधजस्ता दुर्व्यसनबाट टाढा रहन तथा पठनपाठनलाई पनि उत्तिकै प्राथमिकता दिन आग्रह गरे।
विद्यालयका प्रधानाध्यापक ओझाले खेल सामग्री उपलब्ध गराएकोमा वडा कार्यालयप्रति आभार व्यक्त गर्दै यसले विद्यालयमा खेलकुद गतिविधि थप प्रभावकारी बन्ने विश्वास व्यक्त गरे। साथै उनले विद्यार्थीलाई अनुशासित र लगनशील बन्न प्रेरित गरे।
कार्यक्रममा वडा सदस्य श्यामराज जोशी, वडा सचिव हरिसुन्दर श्रेष्ठ, विद्यालयका शिक्षक, विद्यार्थी तथा सञ्चारकर्मीहरूको सहभागिता रहेको थियो।
