बैतडी/ खानेपानी योजनाका लागि पछिल्लो पाँच वर्षमा करिब तीन करोड रुपियाँ बजेट आए पनि बैतडीको मेलौली नगरपालिकाका ४२५ घरपरिवार अझै एक गाग्री पानीका लागि घण्टौँ लाइन बस्न बाध्य छन्।
मेलौली नगरपालिका–९ अन्तर्गत डिडीगाउँ, गर्जल, थपालेक, डाँफेपिपल, मल्लेक, बर्तोला, रोकटा, कलमटा र सुर्काललगायतका बस्तीका बासिन्दा नियमित खानेपानीबाट वञ्चित छन्। गाउँमा पहिलेदेखि सञ्चालनमा रहेको असुर–रोकटा खानेपानी योजनाको मुहान सुक्दै जाँदा पानीको समस्या झनै गम्भीर बन्दै गएको छ।
स्थानीयवासीले विकल्पका रूपमा मेलघट–केदारमाडौँ लिफ्ट खानेपानी योजनाको माग गर्दै आएका छन्। सो योजनाका लागि सङ्घ र प्रदेश सरकारबाट लगातार बजेट आए पनि अहिलेसम्म काम सुरु हुन नसकेको वडा नम्बर ९ का अध्यक्ष लोकराज भट्टले जानकारी दिनुभयो।
उहाँका अनुसार आर्थिक वर्ष २०७८/७९ मा सङ्घ सरकारबाट दुई करोड रुपियाँ बजेट आएर डिपिआरमै सीमित भयो भने बाँकी रकम फ्रिज भयो। त्यसपछि प्रदेश सरकारबाट आएको नौ लाख, ५० लाख, ३० लाख र चालु आर्थिक वर्षको १० लाख रुपियाँ पनि कागजमै अल्झिएको छ।
“बजेट आइरहेको छ, योजना चाहिँ कागजमै थन्किएको छ,” वडाध्यक्ष भट्टले भन्नुभयो, “पाँच वर्ष बितिसक्दा पनि जनताले पानी खान पाएका छैनन्।”
प्रतिक्रिया
सम्बन्धित खवर
