कैलाली — धनगढी उपमहानगरपालिका–४ मा भएको आगलागीले आठवटा सटरमा ठूलो क्षति पुर्याएको छ। नास्ट कलेज नजिकै रहेको क्षेत्रमा आइतबार राति करिब १०:४५ बजे विद्युत् सर्ट भएर आगलागी भएको जिल्ला प्रहरी कार्यालय, कैलालीले जनाएको छ।
प्रहरीका अनुसार विश्वप्रकाश कँडेलद्वारा सञ्चालित हेलेन ट्रेड एण्ड सप्लायर्सका चारवटा सटर, परिवर्तन इम्पेक्स कपडा होलसेल पसलका तीनवटा सटर र सेन्टर पोइन्ट रेस्टुरेन्टमा क्षति पुगेको हो।
आगलागी भएको एक घण्टापछि, राति १२ बजे मात्र नियन्त्रणमा लिइएको थियो। आगो नियन्त्रणका लागि नेपाल प्रहरी, सशस्त्र प्रहरी, स्थानीयवासी र दमकल प्रयोग गरिएको थियो।
प्रहरी उपरीक्षक (एसपी) बालनरसिंह राणाको कमाण्डमा नेपाल प्रहरीका ४५ जना र सहायक प्रहरी निरीक्षक सरोज खतिवडाको नेतृत्वमा सशस्त्र प्रहरीका २५ जनाको टोली परिचालन गरिएको थियो।
आगो निभाउन धनगढी उपमहानगरपालिकाका दुईवटा र गोदावरी नगरपालिकाको एकवटा दमकल प्रयोग गरिएको थियो। आगलागीबाट सटरभित्र रहेका अधिकांश सामग्री पूर्णरूपमा जलेर नष्ट भएका छन्।
