अछाम — अछाम जिल्लाको साँफेबगर नगरपालिका वडा नं. ३ स्थित साँफेहाट बजारमा आज बिहान साढे ३ बजे भीषण आगलागी भएको छ। आगलागीमा परेर १० वटा पसल पूर्ण रूपमा जलेर नष्ट भएका छन्।

सुवेच्छा होटलबाट विद्युत सर्ट भएर सुरु भएको आगो तीव्र गतिमा फैलिँदै आसपासका अन्य पसलमा समेत सल्किएको बताइएको छ। आगलागीबाट लाखौं रुपैयाँ बराबरको क्षति भएको अनुमान गरिएको छ।

स्थानीय बासिन्दा, नेपाल प्रहरी र सशस्त्र प्रहरी बलको सहयोगमा आगो नियन्त्रण प्रयास गरिएको भए पनि वारूणयन्त्रको अभावले गर्दा क्षति धेरै भएको छ। यद्यपि, आगलागीमा मानवीय क्षति भने नभएको प्रारम्भिक जानकारी आएको छ।

हाल घटनास्थलमा सुरक्षाकर्मी र स्थानीय बासिन्दाको सक्रियतामा आगलागी पूर्ण नियन्त्रणमा लिने प्रयास भइरहेको छ। क्षतिको विस्तृत विवरण आउन बाँकी रहेको जनाइएको छ।