काठमाडौं — विद्यालय शिक्षा ऐनको माग गर्दै शिक्षकहरूको आन्दोलन चुलिँदै जाँदा शिक्षा, विज्ञान तथा प्रविधि मन्त्री विद्या भट्टराईले पदबाट राजीनामा दिएकी छन्।
प्रधानमन्त्री केपी शर्मा ओलीलाई सोमबार अपराह्न करिब ५ बजे भेटेर उनले राजीनामा पत्र बुझाएकी हुन्। मन्त्री भट्टराईको सचिवालयले स्वास्थ्य समस्याका कारण राजीनामा दिएको जनाएको छ।
तर, चैत २० गतेदेखि नेपाल शिक्षक महासंघको अगुवाइमा काठमाडौंमा जारी आन्दोलनले शिक्षा मन्त्रालयमाथि ठूलो दबाब सिर्जना गरिरहेको थियो।
विद्यालय शिक्षा ऐन तत्काल ल्याउनुपर्ने माग गर्दै शिक्षकहरू माईतीघर मण्डलादेखि विभिन्न सरकारी कार्यालयसम्म प्रदर्शन गरिरहेका छन्।
सरकार र आन्दोलनरत शिक्षकबीचको वार्ताबाट ठोस सहमति ननिस्कँदा आन्दोलन झन् तीव्र बनेको छ। यस्तै बेला मन्त्री भट्टराईले पद छाडेकी हुन्, जसलाई आन्दोलनसँग पनि जोडेर हेरिएको छ।
शिक्षा मन्त्रालयका एक उच्च स्रोतका अनुसार, मन्त्रीको राजीनामाले ऐन निर्माण र आन्दोलन व्यवस्थापनमा तत्काल असर पार्न सक्छ। अब नयाँ मन्त्री को बन्छ भन्नेमा सबैको चासो बढेको छ।
