कैलाली, वैशाख ८ गते।
कैलालीको गौरीगङ्गा नगरपालिका–४ स्थित कालिका सामुदायिक वनभित्र १६ बिघा क्षेत्रफलमा निर्माण थालिएको हर्बल पार्क हाल ९० लाख रुपैयाँ खर्च भइसकेर पनि अलपत्र अवस्थामा छ। सुरुमा उत्साहपूर्वक थालिएको परियोजना अहिले बजेट सकिएपछि अधुरो काम, जथाभावी संरचना र स्थानीयको आक्रोशको केन्द्र बनेको छ।
सुदूरपश्चिम प्रदेशको सामाजिक विकास मन्त्रालयले पहिलो चरणमा ५० लाख रुपैयाँ विनियोजन गरेर नवीन धामी नेतृत्वको उपभोक्ता समिति गठन गर्यो। समितिले २८ लाख रुपैयाँ खर्चेर एउटा सानो बोरिङ र शौचालय निर्माण गरेपछि काम रोकियो।
त्यसपछि पुनः आर्थिक वर्ष २०७८/७९ मा उद्योग, पर्यटन, वन तथा वातावरण मन्त्रालयअन्तर्गतको इकाईले ४० लाख रुपैयाँ विनियोजन गर्यो। खेम सापकोटाको अध्यक्षतामा नयाँ समिति बनाएर ४० लाखको बजेटमा सामान्य पर्खाल बनाइयो, जुन अहिले जीर्ण भइसकेको छ।
स्थानीयहरू भने आक्रोशित छन्। “पार्क होइन, यो त बजेट पचाउने योजना हो,” स्थानीय मदन भट्ट भन्छन्। अर्का स्थानीय योगेश आचार्यले “दलीय भागबन्डा” गरेर बजेट हडपिएको आरोप लगाएका छन्।
सब–इन्जिनियर नरेन्द्रबहादुर खडायतका अनुसार यस आर्थिक वर्षमा भने पार्कका लागि बजेट विनियोजन गरिएको छैन। १० करोडको योजना भनेर सुरु गरिएको हर्बल पार्कको सपना हाल शौचालय र च्यातिएको तारबारमा सीमित छ।
