सिलगढी — देशमा हाल स्थानीय वायु तथा पश्चिमी वायु प्रणालीको प्रभाव देखिएको छ, जसको असरस्वरूप विभिन्न प्रदेशमा मौसम बदली भएको छ।
मौसम पूर्वानुमान महाशाखाका अनुसार कोसी, बागमती, गण्डकी र कर्णाली प्रदेशका अधिकांश भू–भागमा आंशिकदेखि साधारणतया बदली रहेको छ। बाँकी प्रदेशहरूमा भने आंशिक बदलीदेखि मुख्यतया मौसम सफा रहेको जानकारी दिइएको छ।
हाल कोसी र बागमती प्रदेशका एक–दुई स्थानमा मेघगर्जन र चट्याङसहित हल्का वर्षा भइरहेको छ भने काठमाडौं उपत्यकामा समेत हल्का वर्षा जारी छ। त्यस्तै, सुदूरपश्चिमका डडेलधुरा, कञ्चनपुर र बैतडीजस्ता जिल्लाहरूमा समेत मेघगर्जन र चट्याङसहित वर्षा भइरहेको महाशाखाले जनाएको छ।
महाशाखाको अनुमानअनुसार मौसम प्रणाली क्रमशः पूर्वतर्फ—गण्डकी, लुम्बिनी र कर्णाली प्रदेशतिर सर्दै जानेछ। आज कोसी, बागमती र गण्डकी प्रदेशका पहाडी भू–भागका एक–दुई स्थानमा भारी वर्षा हुने सम्भावना रहेको छ। साथै, देशका उच्च पहाडी र हिमाली भू–भागका केही स्थानमा हल्का वर्षा र हिमपातको सम्भावना पनि रहेको छ।
आज राति कोसी, बागमती, गण्डकी र कर्णाली प्रदेशका पहाडी भू–भागमा आंशिकदेखि साधारण बदली रहनेछ। कोसी, बागमती र गण्डकी प्रदेशका थोरै स्थान तथा कर्णालीका एक–दुई पहाडी क्षेत्रमा मेघगर्जन र चट्याङसहित हल्का वर्षा हुन सक्ने पूर्वानुमान छ।
महाशाखाले मेघगर्जन, चट्याङ र हिमपातका कारण कृषि, दैनिक जनजीवन, स्वास्थ्य, सडक तथा हवाई यातायात प्रभावित हुन सक्ने भन्दै सतर्कता अपनाउन सबैमा अनुरोध गरेको छ।
