कञ्चनपुर – कञ्चनपुरमा लागूऔषध खैरो हेरोइनसहित तीन जना पक्राउ परेका छन्।
भीमदत्त नगरपालिका–११ गड्डाचौकी नजिकबाट वेदकोट नगरपालिका–८ आमथला बस्ने २० वर्षीय दिनेश बम र गैलनदी बस्ने १८ वर्षीय किशोर पक्राउ परेका हुन्। भारतबाट नेपालतर्फ पैदल आउँदै गर्दा उनीहरूलाई प्रहरीले चेकजाँच गर्दा ४ ग्राम २१ मिलिग्राम खैरो हेरोइन फेला परेको थियो।
उनीहरूलाई नेपाल प्रदेश प्रहरी कार्यालय महेन्द्रनगर, जिल्ला प्रहरी कार्यालय कञ्चनपुर, र लागूऔषध नियन्त्रण ब्युरो शाखा महेन्द्रनगरको संयुक्त टोलीले पक्राउ गरेको हो।
यसैगरी, भीमदत्त नगरपालिका–१७ मझगाउँबाट वेदकोट नगरपालिका–५ धरमपुर बस्ने २७ वर्षीय महेश डगौरालाई पनि १.२३ ग्राम खैरो हेरोइनसहित पक्राउ गरिएको छ। उनलाई अस्थायी प्रहरी बिट मझगाउँबाट खटिएको टोलीले नियन्त्रणमा लिएको हो।
पक्राउ परेका तीनै जनामाथि थप अनुसन्धान भइरहेको प्रहरीले जनाएको छ।
