मनमाेहन ठकुल्ला, डाेटी
डाेटी जिल्लाकाे पूर्वीचाैकी गाउँपालिका वडा नम्बर २ बगलेक अबस्थित श्री बाराही देवी आधारभूत विद्यालयका विद्यार्थी जीर्ण र चुहिने भवनमा बसेर पढ्न बाध्य भएका छन् ।
जीर्ण भवनकाे मर्मतसम्भार नहुँदा चुहिने भवनमूनि बसेर पठनपाठन गर्नुपर्ने बाध्यात्मक अबस्था सिर्जना भएकाे उक्त विद्यालले जानकारी दिएकाे छ । टिनले छाएकाे उक्त भवन जीर्ण हुँदा दिनहुँ पानी चुहिने कक्षाकाेठामा बसेर पढ्नुपर्ने बाध्यता रहेकाे विद्यार्थीहरूकाे भनाइ छ । अहिले दैनिक जसाे कक्षाकाेठामा पानी जम्ने गरेकाे कक्षा ६ मा अध्ययनरत एक जना छात्रले बताए ।
विद्यालयमा आर्थिक स्रोत अभावका कारण भवनकाे मर्मत हुन नसकेको विद्यालयका प्रधानाध्यापक कृष्ण बिकले बताए । गाउँपालिकामा भवनको प्रस्ताव पेश गर्दा पनि समस्या हल नभएकाे प्रधानाध्यापक बिक बताउछन् । साथै भवन चारै दिशातिर चर्किएको हुँदा भूकम्पकाे उच्च जाेखिमा रहेकाे प्रधानाध्यापक बिले बताए । प्रधानाध्यापक बिक थप्छन्,” भाैगाेलिक वातावरण अनुसार विद्यार्थीकाे संख्या ठिकै छ तर भवन भुकम्पका कारण चारैतिर चर्किएकाे माथि हेर्दा तारापत्री छ ।”
गाउँपालिकाकाे लगानीमा पछिल्लो तीन वर्षयता विद्यालयका एउटा पनि भाैतिक संरचना निर्माण नभएको गाउँपालिका शिक्षाशाखा प्रमुख विनाेद भट्टले बताए । बाराहीदेवीले विद्यालय भवनकाे माग प्रस्ताव पेश गरेपनि पालिमा बजेट अभावका कारण माग पूर्तिमा समस्या भएकाे शाखा प्रमुख भट्टले जिकिर गरे । उनी थप्छन् ,” विद्यालय भवनकाे एउटै बाराहीदेवीकाे मात्रै समस्या नभएर काँडामाण्डाैँ, गाउँपालिका पेरिफेरिका विद्यालयमा पनि समस्या निम्तिएकाे छ, संघिय बजेट अभाव छ, पालिकाका अधिकांश क्षेत्रमा विद्यालय भवनहरू जिर्ण छन् ।”
