काठमाडौ / नागरिक उन्मुक्ति पार्टीकाे बैठकमा हानाहान भएकाे छ । पार्टी अध्यक्ष रञ्जिता श्रेष्ठ र संरक्षक रेशमलाल चौधरी अर्थात् श्रीमान श्रीमतीबिच बढ्दै गएको विवादले हानाहान भएकाे हाे । आज (सोमबार) पार्टी केन्द्रिय कार्यालयमा रञ्जिता र रेशम पक्षबिच पार्टीभित्र आन्तरिक विवाद कारण हानाहान भएकाे स्रोतले जनाएको छ । त्याेसँगै साे पार्टी टुटफुट हुने संकेत देखिन्छ ।
पति–पत्नी रहेका रेशम–रञ्जिता समूहबिचको विवादले उग्र रुप लिँदा सोमबार पार्टी केन्द्रीय कार्यालयभित्रै कुटाकुट भएको हो। सुदूरपश्चिममा नेपाली कांग्रेस नेतृत्वको सरकारलाई गरेको समर्थन निरन्तरता दिनुपर्ने पक्षमा रहेका रेशम र केन्द्रमा गत फागुन २१ मा बनेको नयाँ गठबन्धनलाई समर्थन गर्नुपर्ने भन्दै अघि बढेको रञ्जिता पक्षबिचको विवादले कुटाकुटको अवस्था सिर्जना भएको हो।
रञ्जिता पक्ष नयाँ गठबन्धनलाई साथ दिँदै सुदूरपश्चिममा आफ्नै पार्टीको नेतृत्वमा सरकार बनाउने तयारी गरे पनि वर्तमान कांग्रेस नेतृत्वकै सरकारलाई समर्थन गर्दै अघि बढ्नुपर्ने रेशम पक्षको अडानले पार्टीभित्रको विवाद कुटपिटमा परिणत भएको हो। बैठकमा रञ्जिता पक्षधर मानिएका टीकापुर नगरपालिकाका मेयरसमेत रहेका रामलाल डगौरा थारू र अर्का नेता रमेश विकमाथि रेशम पक्षधरका नेताहरुले कुटपिट गरेका हुन्।
कुटपिटपछि रञ्जिता पक्षधरका रामलाल र रमेशसँगै पाँच नेता बैठकस्थल छाडेर बाहिरिन पुगेका थिए। रामलालका अनुसार बैठकमा रञ्जिता पक्षधर आफूहरु पाँचजना रहेको र कुटपिटपछि बैठकस्थल छाडेर बाहिरिएको बताए। यसैबीच पार्टीका केन्द्रीय महासचिव गंगाराम चौधरीले यही चैत २३ र २४ गते बिहान ११ बजे केन्द्रीय समिति बैठक बोलाएको सूचना जारी गरेका छन्।
