दार्चुला / भारतद्वारा अतिक्रमित भूमि दार्चुलाको लिम्पियाधुरा क्षेत्रलाई केन्द्रमा राखि ‘डकुमेन्ट्री’ बन्ने भएको छ । जिल्लाको ब्याँस गाउँपालिकाले आव २०७७।०७८ को निति तथा कार्यक्रममा नै उक्त ‘डकुमेन्ट्री’ बनाउने कुरा समाबेश गरेको छ ।
‘सामरिक महत्व बोकेको एवम् त्रिदेशीय सीमामा अवस्थित र दशकौंदेखि अतिक्रमित राष्ट्रिय भूमि लिपुलेक, कालापानी, लिम्पियाधुरासहित समग्र ब्याँस गाउँपालिकाको परिचय झल्कने गरी डकुमेन्ट्री निर्माण गर्ने’ ब्याँस गाउँपालिकाको नीति तथा कार्यक्रम छ ।
२०१५ सालमा भएको नेपालको पहिलो आमनिर्वाचनमा मतदान गरेका र २०१८ सालको राष्ट्रिय जनगणनामा समेटिएका नाबी, कुटी र गुञ्जीवासीले ०३५ सालमा दार्चुला जिल्ला मालपोत कार्यालयमा जग्गाको तिरो तिरेका रसिदहरू छन् । लम्पियाधुरा, कालापानी, लिपुलेक क्षेत्रमा भारतले नेपालको करिब ३९ हजार ५०० हेक्टर भूमि अतिक्रमण गरेको सिमाविदहरू बताउँछन् ।
