शुशीला पन्त / डोटी गत श्रावणमा जिल्लाको आदर्श गाँउपालिका वडा नं. १ खलगडामा घर भत्कदा एकै परिवारका ४ सदस्यले अकालमा ज्यान गुमाए । बर्षाका कारण पुरै परिवार नै तहसनहस भएपछि पिडामा रहेका लोगे विकलाई डोटीको एक सामाजिक संस्थाले राहत स्वरुप ५६ हजार ९ सय ७० रुपैयाँ बराबरको सहयोग गरेको छ ।
थप औषधी उपचारका लागी १० हजार नगद र ४६ हजार ९ सय ७० नेपाली रुपैयाँ बराबरको विभिन्न अत्यावश्यक सामाग्रीहरु राहत स्वरुप हस्तान्तरण गरेको सम विकास केन्द्र नेपाल ईडिसिका बाल प्रायोजन अधिकृत नरेन्द्र वहादुर विक सुप (सुदूरपश्चिम) अनलाईनलाई बताएका छन् । डिसिए र एक्सनएड नेपालको आर्थिक सहयोग र सम विकास केन्द्र नेपाल डोटीको समन्वय सहकार्यमा लोगे विकको परिवारलाई खाद्यान्न, चामल, दाल, नुन, तेल, विभिन्न मरमसलाहरु, ओड्ने ओछाउने कपडा सेट लगायतका अत्यावश्यक सामाग्रीहरु ईडिसिले सहयोग गरेको हो ।
त्यस्तै लोगेको तत्काल जिविकोपार्जनका लागी एकसेट आरन सम्वन्धी कार्यका लागी सामाग्री हस्तान्तरण गरिएको छ । सोहि संस्थामा कार्यरत कर्मचारीहरुले घटना भएको समयमा पहिलो चरणमा तत्काल राहतका लागी नगद ८ हजार ५ सय ५० भाद्र २ गते हस्तान्तरण गरेको थियो । बुधबार पिडित लोगे विकको घरमा पुगी वडा अध्यक्षको रोहबरमा ५६ हजार ९ सय ७० रुपैयाँ बराबर सहयोग सम विकास केन्द्र नेपालका अध्यक्ष अधिराज विसिले गरेको बाल प्रायोजन अधिकृत नरेन्द्र वहादुर विक ले जानकारी दिए । उक्त घटनामा परि लोगे विकको श्रीमती विष्ना विक, १२ वर्षीय छोरा पारस विक, आठ वर्षीया छोरी सिर्जना विक र चार वर्षीया छोरी जेनिसा विकको मृत्यु भएको थियो ।
