समिक्षा आचार्य, काठमाण्डौ / उत्पादनमुलक जमिन विग्रने भन्दै सरकारले लामो समय देखी रोक्का गरेको जग्गा कित्ताकाट कार्यलाई फुकुवा गरे सँगै अखिल नेपाल किसान महासंघले विरोध गरेको छ ।
सरकारको निर्णयले माफिया, दलालहरुलाई पोस्ने र देशलाई खाद्य संकटको दिशातर्फ उन्मुख गराउने दाबी गर्दै महासंघले जग्गा कित्ताकाट रोक्का गर्न माग गरेको हो ।
सत्तारुढ नेकपाकै जनवर्गीय संगठन अखिल नेपाल किसान महासंघले कृषि भूमिको कित्ताकाट र खण्डीकरण तत्काल रोक्न र वैज्ञानिक भू–उपयोग सम्बन्धी आवश्यक नियमावली तथा निर्देशिकाहरु यथाशीघ्र जारी गरी भू–उपयोग ऐनको अविलम्ब कार्यान्वयन गर्न विज्ञप्ती जारी गर्दै माग गरेको छ ।
विज्ञप्तीमा भनीएको छ,
‘यो निर्णयले नेपालको कृषि भूमिलाई खण्डीकरण गर्ने, गैर कृषि क्षेत्रमा उपयोग हुने अवस्था सिर्जना गर्ने, कृषि भूमिलाई व्यापारको वस्तु बनाउने, गरिब किसानहरुलाई आफ्नो जमिन बलजफ्ति सस्तोमा बेच्न बाध्य बनाई भूमाफिया तथा दलालहरुलाई पोस्ने र नेपाललाई खाद्य संकटको दिशातर्फ उन्मुख गराउने काम भएको छ।’
