डोटी / डोटीको दिपायल सिलगढी नगरपालिका–६ नाचनथलीमा जीप दुर्घटना हुँदा एक महिला घाइते भएकी छन्।
बुधबार साँझ करिब ५:१० बजे जिल्ला अस्पताल डोटीबाट अछामतर्फ जाँदै गरेको सु.प.प्र. ०१–००१ ज ११९३ नम्बरको जीप अनियन्त्रित भई सडकबाट करिब सात मिटर तल खसेको जिल्ला प्रहरी कार्यालय डोटीले जनाएको छ।
प्रहरीका अनुसार अछामको चौरपाटी गाउँपालिका–२ सोकडका २२ वर्षीय कर्णबहादुर साउँदले चलाएको उक्त जीपमा चालकसहित ६ जना सवार थिए। दुर्घटनामा सोही ठाउँकी ४० वर्षीया भागीदेवी साउँद घाइते भएकी छन्। उनको निधार र दाहिने खुट्टामा चोट लागेको छ।
घाइते साउँदको जिल्ला अस्पताल डोटीमा उपचार भइरहेको र उनको अवस्था मध्यम रहेको प्रहरीले जनाएको छ। जीपमा सवार अन्य पाँच जना भने सकुशल रहेका छन्।
दुर्घटनामा जीपको अगाडिको भागमा क्षति पुगेको छ। प्रहरी हवल्दार दिलीप राम लुहारको कमाण्डमा तीन जनाको प्रहरी टोली घटनास्थलमा खटिएको थियो। दुर्घटनामा संलग्न जीप घटनास्थलमै रहेको र चालकलाई प्रहरीले नियन्त्रणमा लिएको जनाएको छ।
प्रतिक्रिया
सम्बन्धित खवर
