सिलगढी / दिपायल–सिलगढी क्षेत्रमा नगर बस सञ्चालनप्रति असन्तुष्टि जनाउँदै जिप चालकहरूले सेवा बन्द गरेका छन्। आइतबारदेखि जिप सेवा रोकिँदा स्थानीय यात्रुहरूलाई आवतजावतमा समस्या भएको छ।
चालकहरूकाअनुसार नगर बस सीमित क्षेत्रमा मात्र सञ्चालन हुँदा जिप व्यवसाय प्रत्यक्ष रूपमा प्रभावित भएको छ। यही असन्तुष्टिका कारण विरोधस्वरूप सेवा बन्द गरिएको उनले बताए।
जिप चालकहरूले तिखा, राजपुर, कलेना, शान्तिनगर र लडागडा लगायतका क्षेत्रमा पनि नगर बस सञ्चालन गर्न माग गरेका छन्। सबै क्षेत्रमा समान रूपमा सेवा विस्तार भए मात्र प्रतिस्पर्धा निष्पक्ष हुने उनीहरूको भनाइ छ।
शैलेश्वरी यातायात व्यवसायी संघ का अध्यक्ष गणेश मलासीले समस्या समाधानका लागि नगरपालिकासँग छलफल भइरहेको र छिट्टै निकास निकाल्ने प्रयास भइरहेको बताए।
जिप सेवा बन्द भएसँगै यात्रुहरू बीचमै अलमलमा परेका छन् भने स्थानीयले समस्या चाँडो समाधान गर्न सम्बन्धित निकायसँग आग्रह गरेका छन्।
