धनगढी — कैलाली र कञ्चनपुरका विभिन्न स्थानबाट लागूऔषधसहित पाँच जना पक्राउ परेका छन्। जिल्ला प्रहरी कार्यालय कैलालीका अनुसार धनगढी उपमहानगरपालिका–८ धनगढी गाउँबाट भारतको लखिमपुर खिरी पलिया बस्ने २२ वर्षीय राजन गुप्तालाई १ ग्राम ३३० मिलिग्राम खैरो हेरोइनजस्तो देखिने पदार्थसहित शनिबार साँझ पक्राउ गरिएको हो। शंका लागेपछि गरिएको चेकजाँचका क्रममा उनको साथबाट उक्त पदार्थ फेला परेको प्रहरीले जनाएको छ।
यसैगरी कैलालीको गोदावरी नगरपालिका–११ गौडीबजारमा लागूऔषध सेवन तथा कारोबार भइरहेको सूचनाका आधारमा प्रहरीले स्थानीय लोकेन्द्र कठायतले सञ्चालन गरेको खुद्रा पसलमा खानतलासी गर्दा ६७० मिलिग्राम खैरो हेरोइनजस्तो देखिने पदार्थ बरामद भएको छ। सो क्रममा पसल सञ्चालक कठायत र सोही स्थानका २१ वर्षीय केशब नेपालीलाई शनिबार साँझ प्रहरीले नियन्त्रणमा लिएको छ।
त्यस्तै कञ्चनपुरको बेलौरी नगरपालिका–१० सडकघाट पिपलचौताराबाट धनगढी उपमहानगरपालिका–८ क्याम्पस रोड बस्ने ३५ वर्षीय केशब बिष्ट र डडेल्धुराको आलिताल गाउँपालिका–३ बस्ने २३ वर्षीय कृष्ण महरालाई ४५० मिलिग्राम खैरो हेरोइनजस्तो देखिने पदार्थसहित पक्राउ गरिएको प्रहरीले जनाएको छ। उनीहरू भारतबाट नेपालतर्फ आउँदै गरेको अवस्थामा से ७ प २२६६ नम्बरको मोटरसाइकल चेकजाँच गर्दा उक्त पदार्थ फेला परेको हो।
प्रहरीले घटनासम्बन्धी थप अनुसन्धान भइरहेको जनाएको छ।
