डोटी, फागुन १०
जिल्लाको बोगटान फुड्सिल गाउँपालिका–३ धौलाबस्तीस्थित दिपायल–बोगटान भित्री सडकखण्डमा बोलेरो जीप दुर्घटना हुँदा चालकसहित चार जना घाइते भएका छन्। घाइतेमध्ये तीन जनाको अवस्था गम्भीर रहेको प्रहरीले जनाएको छ।
दुर्घटनामा चालक बोगटान फुड्सिल गाउँपालिका–६ पलाडीका २७ वर्षीय तिर्थ बोगटी घाइते भएका छन्। उनको टाउको र घाँटीमा चोट लागेको छ र अवस्था मध्यम रहेको बताइएको छ।
त्यस्तै, बोगटान फुड्सिल–३ मेल्टाकी ६६ वर्षीया जुना देवी साउँद, १७ वर्षीया सिता साउँद र १९ वर्षीया सारदा साउँद पनि घाइते भएका छन्। जुना देवी र सिताको टाउको, खुट्टा तथा छातीमा गम्भीर चोट लागेको छ भने सारदाको कम्मर, दुवै हात र बायाँ खुट्टामा चोट लागेको प्रहरीले जनाएको छ।
घाइते चारै जनालाई थप उपचारका लागि मायामेट्रो अस्पताल, धनगढी पठाइएको छ।
जिल्ला प्रहरी कार्यालय डोटीका अनुसार आइतबार दिउँसो करिब १२:५५ बजे मेल्टाबाट दिपायलतर्फ जाँदै गरेको सु.प.प्र. ०३–००१ च ००१४ नम्बरको बोलेरो जीप साइड दिने क्रममा ब्याक गर्दा सडकबाट करिब १५० मिटर तल खसेर दुर्घटनामा परेको हो।
प्रहरी निरीक्षक रामबहादुर कार्कीको कमाण्डमा खटिएको टोलीले घटनास्थल पुगेर उद्धार तथा प्रारम्भिक अनुसन्धान गरेको र दुर्घटनाबारे थप अनुसन्धान भइरहेको जिल्ला प्रहरी कार्यालयले जनाएको छ।
