सिलगढी। नेपालमा हाल पश्चिमी वायुको आंशिक प्रभाव देखिएको छ। जल तथा मौसम विज्ञान विभागअन्तर्गतको मौसम पूर्वानुमान महाशाखाका अनुसार यसको प्रभावले देशका विभिन्न भूभागमा बदली र हिमपातको सम्भावना रहेको छ।

हाल गण्डकी, कर्णाली र सुदूरपश्चिम प्रदेशका पहाडी तथा हिमाली क्षेत्रमा आंशिक बदली देखिएको छ। अन्य हिमाली भूभागमा पनि बादल लागेको छ भने बाँकी क्षेत्रमा मौसम सामान्यतया सफा रहेको महाशाखाले जनाएको छ।

आज दिउँसो तराईका केही स्थानमा हुस्सु लाग्ने अनुमान गरिएको छ। कोशी, गण्डकी र बागमती प्रदेशका उच्च पहाडी तथा हिमाली क्षेत्रका थोरै स्थानमा हल्का वर्षा तथा हिमपातको सम्भावना रहेको मौसमविद्ले बताएका छन्। अन्य प्रदेशका उच्च पहाडी क्षेत्रका एक–दुई स्थानमा पनि हल्का वर्षा र हिमपात हुन सक्ने अनुमान छ। तराई क्षेत्रमा भने दिउँसोको मौसम मुख्यतया सफा रहनेछ।

रातिको समयमा तराईका केही स्थानमा तुवाँलो लाग्नेछ। कोशी, बागमती, गण्डकी र कर्णाली प्रदेशका हिमाली भेगमा आंशिक बदली रहनेछ। कोशी, गण्डकी र कर्णालीका हिमाली क्षेत्रका थोरै स्थानमा राति पनि हल्का वर्षा र हिमपातको सम्भावना रहेको महाशाखाले जनाएको छ।