सिलगढी/ आईसीसी टी–२० विश्वकप २०२६ अन्तर्गत नेपालले स्कटल्यान्डलाई ७ विकेटले पराजित गर्दै १२ वर्षपछि विश्वकपमा ऐतिहासिक जित हासिल गरेको छ।
लगातार तीन खेलमा पराजित भएको नेपालले चौथो खेलमा सान्त्वना जित निकालेको हो। यसअघि नै दुवै टोली समूह चरणबाट बाहिरिसकेका थिए। जितसँगै नेपालको यस संस्करणको विश्वकप यात्रा समाप्त भएको छ। यसअघि नेपाल इंग्ल्यान्ड, इटली र वेस्ट इन्डिजसँग पराजित भएको थियो।
भारतको मुम्बईस्थित वानखेडे स्टेडियममा टस हारेर पहिले ब्याटिङ गरेको स्कटल्यान्डले निर्धारित २० ओभरमा ७ विकेट गुमाउँदै १७० रन बनाएको थियो। नेपालले उक्त लक्ष्य ४ बल बाँकी रहँदा ३ विकेट गुमाएर पूरा गर्यो।
स्कटल्यान्डका लागि माइकल जोन्सले उत्कृष्ट ब्याटिङ गर्दै ४५ बलमा ८ चौका र ३ छक्कासहित ७१ रन बनाए। साथै जर्ज मुन्सेले २७ र ब्रान्डन म्याकमुलेनले २५ रन जोडे। नेपालका सोमपाल कामीले ३ विकेट लिए भने नन्दन यादवले २ विकेट हात पारे। रोहित पौडेल र कुशल भुर्तेलले समान १–१ विकेट लिए।
जवाफमा नेपालका ओपनर आसिफ शेख र कुशल भुर्तेलले पहिलो विकेटका लागि ७४ रनको साझेदारी गर्दै बलियो सुरुआत दिलाए। भुर्तेलले ४३ र आसिफले ३३ रन बनाए। अन्तिम समयमा दीपेन्द्रसिंह ऐरीले आक्रामक ब्याटिङ गर्दै अविजित ५० रन बनाएर टोलीलाई जितसम्म पुर्याए।
