कैलाली, माघ २०
कैलालीको टिकापुरमा ट्याक्टर दुर्घटना हुँदा एक युवकको ज्यान गएको छ भने अर्का एक जना घाइते भएका छन्। दुर्घटना मंगलबार टिकापुर नगरपालिका–७ स्थित प्रतिपुरको हुलाकी सडकखण्डमा भएको हो।
प्रहरीका अनुसार टिकापुरबाट भजनीतर्फ जाँदै गरेको भे १ त ४५५६ नम्बरको सरिया लोड गरिएको ट्याक्टर अनियन्त्रित भई दुर्घटनामा परेको हो। दुर्घटनामा ट्रालीमा सवार भजनी नगरपालिका–७ चर्राका २५ वर्षीय कबिर कठरिया गम्भीर घाइते भएका थिए।
घाइते कठरियालाई उपचारका लागि टिकापुर अस्पताल लगिएकोमा उपचारकै क्रममा राति चिकित्सकले मृत घोषणा गरेका हुन्। सोही दुर्घटनामा भजनी नगरपालिका–७ कै ३४ वर्षीय पंकज कठरिया घाइते भएका छन्। उनलाई थप उपचारका लागि नेपालगञ्जस्थित एक नर्सिङ होममा रिफर गरिएको प्रहरीले जनाएको छ।
दुर्घटनापछि ट्याक्टर चालक २७ वर्षीय सहिराज अली फरार रहेका छन्। उनको खोजी कार्य जारी रहेको प्रहरीले जनाएको छ। दुर्घटनाको कारण खुल्न नसकेको र घटनाबारे थप अनुसन्धान भइरहेको प्रहरीले जानकारी दिएको छ।
प्रतिक्रिया
सम्बन्धित खवर
