सिलगढी। आसन्न फागुन २१ गते हुने प्रतिनिधिसभा निर्वाचनका लागि सुदूरपश्चिम प्रदेशमा उम्मेदवारको भिड लागेको छ। प्रदेशका १६ प्रतिनिधिसभा निर्वाचन क्षेत्रमा मङ्गलबार २१० जनाले मनोनयन दर्ता गराएका छन्।

सुदूरपश्चिम प्रदेश निर्वाचन कार्यालयका प्रवक्ता दिलीप भाटका अनुसार सबैभन्दा धेरै उम्मेदवार कैलाली जिल्लामा देखिएका छन्। पाँच निर्वाचन क्षेत्र रहेको कैलालीमा मात्रै ७८ जनाले उम्मेदवारी दर्ता गराएका छन्। कैलाली–१ मा १९, कैलाली–२ मा १६, कैलाली–३ मा ११, कैलाली–४ मा १६ र कैलाली–५ मा १६ जना उम्मेदवार मैदानमा उत्रिएका छन्।

कञ्चनपुरका तीन निर्वाचन क्षेत्रमा पनि प्रतिस्पर्धा कडा देखिएको छ। कञ्चनपुर–१ र २ मा समान १९/१९ जना तथा कञ्चनपुर–३ मा १७ जनाले मनोनयन दर्ता गराएका छन्।

पहाडी जिल्लामा तुलनात्मक रूपमा कम उम्मेदवार देखिएका छन्। अछाम–१ मा ८, अछाम–२ मा ९, डोटीमा ९, बाजुरामा ८, बझाङमा ७, बैतडीमा १२, दार्चुलामा ११ र डडेल्धुरामा १३ जनाले उम्मेदवारी दर्ता गराएका छन्।

कूल १७ लाख १६ हजार ६६० मतदाता रहेको सुदूरपश्चिममा प्रमुख राजनीतिक दल, साना दल तथा स्वतन्त्र उम्मेदवारहरू चुनावी मैदानमा उत्रिँदा यसपटकको निर्वाचन रोचक र प्रतिस्पर्धात्मक हुने संकेत देखिएको छ।