काठमाडौं /नेपाली कांग्रेसभित्र नेतृत्व र आधिकारिकताका विषयमा विवाद चर्किँदै गएको छ। महामन्त्रीद्वय गगन थापा र विश्वप्रकाश शर्मा समूहले विशेष महाधिवेशनमार्फत निर्वाचन आयोगमा आधिकारिकताको दाबी गरेकै भोलिपल्ट पार्टीको संस्थापन पक्ष पनि आयोग पुगेको छ।

सभापति शेरबहादुर देउवा नेतृत्वको समूहका तर्फबाट कार्यवाहक सभापति पूर्णबहादुर खड्काको नेतृत्वमा उपसभापति धनराज गुरुङ, नेता डा. शशांक कोइराला, मिन विश्वकर्मा, नैनसिंह महरलगायत ठूलो संख्यामा नेता तथा कार्यकर्ताहरू निर्वाचन आयोग पुगेका हुन्। उनीहरूले पार्टीको आधिकारिकता आफूहरूकै पक्षमा रहेको दाबी गर्दै आवश्यक कागजात आयोगमा बुझाएका छन्।

संस्थापन पक्षले विशेष महाधिवेशन विधानविपरीत भएको दाबी गर्दै गगन थापाको नेतृत्वमा घोषणा गरिएको नयाँ केन्द्रीय कार्यसमितिलाई अस्वीकार गरेको छ। देउवा पक्षले यसअघि नै गगन थापासहितका नेताहरूलाई कारबाहीसमेत गरिसकेको छ।

यसअघि बिहीबार गगन थापा नेतृत्वको विशेष महाधिवेशन पक्षधर समूहले निर्वाचन आयोगमा नयाँ केन्द्रीय कार्यसमितिको विवरण अद्यावधिक गर्न निवेदन दिएको थियो। गगन थापा सभापतिसहित नवनिर्वाचित पदाधिकारीहरूले विशेष महाधिवेशन विधानसम्मत, वैधानिक र बहुमत प्रतिनिधिको सहभागितामा सम्पन्न भएको दाबी गर्दै पार्टीको आधिकारिकता माग गरेका थिए।

कांग्रेसका दुवै पक्षले एक–अर्काविरुद्ध कागजातसहित दाबी पेश गरेपछि निर्वाचन आयोगले दुवै निवेदन अध्ययन गरिरहेको जनाएको छ। आयोग परिसरमा नेता–कार्यकर्ताको भीड बढ्दै गएपछि सुरक्षा व्यवस्था कडा बनाइएको छ।

कांग्रेसभित्रको यो शक्ति संघर्षले पार्टीको भविष्य र आन्तरिक एकतालाई कुन दिशातर्फ लैजान्छ भन्ने विषय अहिले चासोको केन्द्र बनेको छ ।