डोटी — पुस २५ शुक्रबार
डोटीमा मोटरसाइकलको ठक्करबाट घाइते एक वृद्ध महिलाको उपचारका क्रममा मृत्यु भएको छ। दुर्घटनामा ज्यान गुमाउनेमा शिखर नगरपालिका–१० बान्डुङग्रीसैनकी ६८ वर्षीया तारा देवी बलायर रहेकी छन्।
धनगढीबाट दिपायलतर्फ जाँदै गरेको सुदूरपश्चिम प्रदेश ०१–०१३ प ८१२८ नम्बरको मोटरसाइकलले बाटो काट्ने क्रममा पैदल यात्री बलायरलाई ठक्कर दिएको थियो।
दुर्घटनामा बलायरको टाउको, अनुहार र दुवै खुट्टामा गम्भीर चोट लागेको थियो। उनलाई तत्काल स्थानीय मेडिकलमा सामान्य उपचारपछि थप उपचारका लागि डडेल्धुरा अस्पताल लगिएकाे र उपचारकै क्रममा उनको मृत्यु भएको डाेटी प्रहरीले जनाएको छ।
जिल्ला प्रहरी कार्यालय डोटीका अनुसार आज (शुक्रबार ) दिउँसो करिब साढे ३ बजे के.आई. सिंह राजमार्ग अन्तर्गत बान्डुङग्रीसैन क्षेत्रमा दुर्घटना भएको हो।
मोटरसाइकल चालक दिपायल सिलगढी नगरपालिका–२ खुल्लेक निवासी २६ वर्षीय मोहन बोगटीलाई प्रहरीले नियन्त्रणमा लिएको छ। घटनाबारे थप अनुसन्धान भइरहेको जिल्ला प्रहरी कार्यालय डोटीले जनाएको छ।
