कैलाली — अदालतबाट कैद तथा जरिवाना सजाय तोकिएपछि लामो समयदेखि फरार रहेका ६ जनालाई प्रहरीले कैलालीबाट पक्राउ गरेको छ।
लागूऔषध मुद्दामा ६ महिना कैद सजाय तोकिएका जोशीपुर गाउँपालिका–१ का २५ वर्षीय रबिन शाह र सोही उमेरका छवि भन्ने छत्रराज पाठक पक्राउ परेका छन्। यस्तै, सवारी ज्यान मुद्दामा १९ दिन कैद र ३२ हजार रुपैयाँ जरिवाना सजाय पाएका भजनी नगरपालिका–५ का २८ वर्षीय रुकेश डगौरा पनि नियन्त्रणमा परेका छन्।
त्यसैगरी, भ्रष्टाचार मुद्दामा ६ महिना कैद र १० हजार रुपैयाँ जरिवाना सजाय तोकिएका जोशीपुर गाउँपालिका–७ का ४५ वर्षीय रामचन्द्र ओझा पक्राउ परेका छन्। ओखेटापहार मुद्दामा १ महिना १९ दिन कैद सजाय भएका भजनी नगरपालिका–८ का ३५ वर्षीय प्रशुराम चौधरी तथा वन मुद्दामा ५ महिना १९ दिन कैद र ६० हजार ६२४ रुपैयाँ जरिवाना सजाय तोकिएका घोडाघोडी नगरपालिका–४ का ६५ वर्षीय भैया चौधरी पनि पक्राउ सूचीमा रहेका छन्।
जिल्ला अदालत कैलालीको विभिन्न मितिमा भएको फैसलाअनुसार कैद तथा जरिवाना ठहर भई फरार रहेका ती सबै प्रतिवादीलाई मंगलबार जिल्ला प्रहरी कार्यालय कैलाली तथा मातहत कार्यालयबाट खटिएको प्रहरी टोलीले पक्राउ गरेको जनाएको छ।
पक्राउ परेकाहरूलाई आवश्यक कानुनी प्रक्रिया पूरा गरी सजाय कार्यान्वयनका लागि सम्बन्धित निकायमा बुझाइने प्रहरीले जानकारी दिएको छ।
