बाजुरा /बाजुरामा शनिबार भएका छुट्टाछुट्टै दुई सवारी दुर्घटनामा ३६ जना घाइते भएका छन्।

पहिलो घटना बूढीनन्दा नगरपालिका–७ सेरकाटियामा भएको हो। कोल्टीबाट धनगढीका लागि छुटेको यात्रुबहाक बस (सुप–प्र ०१–००१ ख ३१८१) दुर्घटनामा पर्दा ३० जना घाइते भएका छन्। जिल्ला प्रहरी कार्यालय बाजुराका अनुसार घाइतेमध्ये २४ जनाको उपचार जिल्ला अस्पताल बाजुरामा, सात जनाको कोल्टी आधारभूत अस्पतालमा भइरहेको छ। गम्भीर घाइते चार जनालाई थप उपचारका लागि धनगढी पठाइएको छ।

प्रारम्भिक अनुसन्धान अनुसार बस उकालोमा सामान राख्ने क्रममा दुर्घटनाग्रस्त भएको जनाइएको छ। दुर्घटनापछि चालक फरार रहेका र प्रहरीले खोजतलास जारी राखेको जनाएको छ।

तेही दिन अर्को दुर्घटना बूढीनन्दा नगरपालिका–१० पाण्डुसैनमा भएको हो। मार्तडीबाट कोल्टी जाँदै गरेको जिप (भे१च ७८७) अनियन्त्रित भई सडकबाट खसेको प्रहरीले जनाएको छ। उक्त दुर्घटनामा चालकसहित छ जना घाइते भएका छन्।

घाइतेहरू — चालक तुलाराम चदारा, शङ्करराज जैसी, सेते लुहार, जङ्गवीर सार्की, जयलाल विक, र जयराज जैसी — सबैको उपचार कोल्टी आधारभूत अस्पतालमा भइरहेको छ।