कञ्चनपुर — जिल्लाको बेल्डाडी र दैजी क्षेत्रबाट प्रहरीले मङ्गलवार बिहान १५ जना जुवाडेलाई पक्राउ गरेको छ।
प्रहरीका अनुसार बिहान करिब ४ बजे बेल्डाडी गाउँपालिका–२ चौवन्नी बजारस्थित लोकेन्द्र बडालको झलक क्याफे मा चलिरहेको जुवा तास खेलमा संलग्न ८ जनालाई नियन्त्रणमा लिइएको हो। इलाका प्रहरी कार्यालय बेल्डाडीबाट खटिएको टोलीले क्याफेको दोस्रो तलाबाट ६ गड्डी तास र नगद २७ हजार ८६५ रुपैयाँसहित पक्राउ गरेको जनाएको छ।
त्यस्तै, बिहान करिब साढे १० बजे वेदकोट नगरपालिका–३ दैजीस्थित बेल्डाडी चोकमा रहेको योगसिंह मालीको घरमा जुवा खेलिरहेका ७ जनालाई पनि पक्राउ गरिएको प्रहरीले जनाएको छ।
अस्थायी प्रहरी पोष्ट दैजीबाट खटिएको टोलीले ४ गड्डी तास र नगद ५१ हजार २६० रुपैयाँसहित उनीहरूलाई नियन्त्रणमा लिएको जनाएको छ।
प्रहरीका अनुसार दुवै घटनाबारे थप अनुसन्धान भइरहेको छ।
