बैतडी । मौसममा आएको परिवर्तनसँगै जिल्लाका विभिन्न गाउँ–गाउँमा भाइरल ज्वरो र रुघाखोकीका बिरामी बढेका छन्।
शिखरपुर स्वास्थ्यचौकीका प्रमुख बिरबहादुर बोहराका अनुसार हालका दिनमा ज्वरोका बिरामी उल्लेख्य रूपमा वृद्धि भएका छन्। रौलेश्वर स्वास्थ्यचौकीका प्रमुख नरेश मडैलले पनि उपचारका लागि आउने बिरामीमध्ये अधिकांशमा भाइरल ज्वरो देखिएको बताए।
पाटन प्राथमिक स्वास्थ्य केन्द्रका प्रमुख प्रेमसागर भट्टका अनुसार दैनिक झण्डै ७० जना बिरामी आउने गरेका छन्, जसको आधाजति ज्वरोका बिरामी हुन्छन्।
जिल्ला अस्पताल बैतडीका सूचना अधिकारी हरिश पन्तका अनुसार अस्पतालमा पनि दैनिक ४० भन्दा बढी भाइरल ज्वरोका बिरामी आउने गरेका छन्। उनका अनुसार डेङ्गी र स्क्रबटाइफसका बिरामी पनि अस्पतालमा उपचारका लागि आउने गरेका छन्।
स्वास्थ्यकर्मीका अनुसार भाइरल ज्वरो भएका बिरामीमा ज्वरो बढ्ने, चिसो लाग्ने, हल्का खोकी, घाँटी दुख्ने, हाँच्छिउँ आउने, नाकबाट पानी झर्ने, टाउको र शरीर दुख्ने, हाडजोर्नी पीडा हुने लक्षण देखिन्छ।
संक्रमण बढेसँगै पानी उमालेर वा शुद्धीकरण गरेर मात्र पिउन र सतर्कता अपनाउन स्वास्थ्यकर्मीले सबैलाई आग्रह गरेका छन्।
