सिलगढी / राष्ट्रिय स्वतन्त्र पार्टी (रास्वपा) का सभापति रवि लामिछानेले आफू थाकेका छैनन्, गलेका छैनन् भन्दै पार्टीका नेता तथा कार्यकर्तालाई पनि मनोबल नघटाउन सन्देश दिएका छन्।
शुक्रबार पार्टी केन्द्रीय कार्यालयमा आयोजित कार्यक्रममा बोल्दै उपसभापति डोलप्रसाद अर्यालले भैरहवा कारागारमा रहेका सभापति लामिछानेको सन्देश सञ्चारकर्मीहरूलाई सुनाएका हुन्।
“म थाकेको छैन, म गलेको छैन, म गल्दिनँ। त्यसैले तपाईंहरूलाई पनि गल्ने छुट छैन,” अर्यालले सभापतिको भनाइ उद्धृत गर्दै भने।
सभापतिले जनताको विश्वास र आशालाई निराशामा परिणत हुन नदिन आग्रह गर्दै पार्टीलाई एकढिक्का बनाइराख्न, संगठन विस्तारमा लाग्न र विदेशमा रहेका शुभचिन्तकहरूको भावना बुझ्न सुझाव दिएका उनले बताए।
सञ्चारमाध्यमहरूमा आएका सबै सांसदले लामिछानेलाई भेट्न नपाएको भन्ने समाचारप्रति प्रतिक्रिया दिँदै उपसभापति अर्यालले त्यसमा सत्यता नरहेको बताए। “हामीले कुनै शक्ति प्रयोग गरेका होइनौं, सर्वसाधारणझैँ प्रक्रिया पुर्याएर मात्र भेट गरेका हौं,” उनले भने। उनका अनुसार विशेष कारणले तीन जना बाहेक सबै सांसदले लामिछानेलाई भेटेका छन्।
रास्वपाले सुरु गरेको हस्ताक्षर संकलन अभियानबारे उनले बोले, “यो अभियान अन्यायमा परेका एक नागरिकको पक्षमा ऐक्यबद्धता जनाउन सुरु गरिएको हो।” नागरिकबीच पुग्दा उत्साहजनक समर्थन प्राप्त भएको उनको भनाइ थियो।
साथै, अर्यालले संसद बैठकअघि काठमाडौंमा संसदीय दलको बैठक बस्ने र त्यस बैठकमा संसदमा प्रस्तुत हुने रणनीति तय गरिने जानकारी पनि दिए।
