सिल्गढी असार १ – आज दिउँसो र राति देशभर आंशिकदेखि साधारण बदली हुने मौसम पूर्वानुमान गरिएको छ। कोशी, मधेश, बागमती र गण्डकी प्रदेशका केही स्थानहरूमा तथा बाँकी भूभागका थोरै स्थानहरूमा मेघगर्जन र चट्याङसहित हल्का देखि मध्यम वर्षा हुने सम्भावना रहेको जल तथा मौसम पूर्वानुमान महाशाखाले जनाएको छ।

कोशी प्रदेशको एक-दुई स्थानमा भने भारीदेखि धेरै भारी वर्षाको सम्भावना छ। यस्तै, बागमती र गण्डकीका उच्च पहाडी तथा हिमाली भूभागका थोरै स्थानहरूमा तथा अन्य प्रदेशका उच्च पहाडी र हिमाली क्षेत्रमा एक-दुई स्थानमा हल्का वर्षा वा हिमपात हुने अनुमान गरिएको छ।

रातिको पूर्वानुमान अनुसार पनि देशभर आंशिकदेखि साधारण बदली रहनेछ। सबै प्रदेशका केही स्थानहरूमा मेघगर्जन/चट्याङसहित हल्का देखि मध्यम वर्षा हुने सम्भावना छ भने गण्डकी प्रदेशका थोरै स्थानहरूमा र कोशी, मधेश, बागमती, लुम्बिनी तथा सुदूरपश्चिम प्रदेशका एक-दुई स्थानमा भारीदेखि धेरै भारी वर्षा हुनसक्ने अनुमान गरिएको छ।

उच्च पहाडी र हिमाली क्षेत्रमा रातिको समयमा पनि वर्षा वा हिमपातको सम्भावना रहेको महाशाखाले जनाएको छ।

हालको अवस्थाः हाल कोशी, मधेश, बागमती, गण्डकी र लुम्बिनी प्रदेशका पूर्वी भू-भागमा मनसुनी वायुको प्रभाव देखिएको छ भने देशको पश्चिमी भू-भागमा पश्चिमी वायु तथा स्थानीय वायुले प्रभाव पारिरहेको छ।

देशको पहाडी क्षेत्रमा आंशिकदेखि साधारण बदली रहेको छ भने बाँकी भूभागमा मुख्यतया सफा वा आंशिक बदली देखिएको छ।

सावधानीका लागि सुझावः भारी वर्षाको सम्भावना रहेको स्थानहरूमा पहिरो, बाढी र सडक अबरुद्धजस्ता जोखिम हुन सक्ने भएकाले सतर्क रहन मौसमविद्हरूले सुझाव दिएका छन्।