सिलगढी /डोटीकाे दिपायल सिलगढी नगरपालिकामा लैंगिक हिंसा न्यूनीकरणका लागि नगर स्तरीय सञ्जालले पाँच बुँदे मागपत्र पेश गरेको छ। सञ्जालले आर्थिक वर्ष २०८२/८३ को नीति, योजना तथा बजेटमा लैंगिक हिंसा रोकथामका कार्यक्रम समावेश गर्न माग गर्दै यो ज्ञापनपत्र नगरपालिकालाई बुझाएको हो।
उक्त नगर स्तरीय लैङ्गकि हिंसा रोकथाम तथा प्रतिकार्य सञ्जालमा श्रमिक, संस्थागत र सामाजिक अभियन्ता, साथै जनप्रतिनिधिहरूको सक्रिय सहभागिता रहेको छ। सञ्जालले नगरमा हुने अधिकांश बजेट भौतिक पूर्वाधार—जस्तै सडक, पुल, मन्दिर—निर्माणतर्फ केन्द्रित भए पनि सामाजिक समस्याहरू जस्तै हिंसा, विभेद, र असमानता भने बेवास्ता हुँदै आएको गुनासो उठाएको छ।
सञ्जालद्वारा प्रस्तुत पाँच मुख्य मागहरू के के छन् ?
१. लैंगिक मैत्री नीति तथा कार्यक्रम निर्माणका लागि बजेट विनियोजन।
२. नगरस्तरीय हिंसा रोकथाम कोषमा पर्याप्त बजेट व्यवस्था।
३. हिंसा प्रभावितहरूको न्यायमा पहुँच तथा पुनःस्थापनाका लागि बजेट सुनिश्चितता।
४. वडास्तरमा लैंगिक हिंसा निवारण कोष स्थापना र त्यसको वृद्धिमा नगरपालिका स्तरको सहजीकरण।
५. हिंसा प्रभावितहरूलाई सिप विकास र आर्थिक सशक्तिकरण कार्यक्रममार्फत आत्मनिर्भर बनाउने व्यवस्था।
सञ्जालले तथ्यांकलाई आधार बनाउँदै नगरमा लैंगिक तथा घरेलु हिंसाका घटनाहरू बढ्दो क्रममा रहेको जनाउँदै, हिंसा पीडितका लागि न्याय, सुरक्षा र पुनःस्थापनाको वातावरण सिर्जना गर्न नीतिगत र बजेटीय प्रतिबद्धता अपरिहार्य भएको स्पष्ट पारेको छ।
नगरप्रमुख बाजि सिं खड्काले उक्त मागपत्रलाई स्वीकार गर्दै आगामी कार्यकालमा मानव विकास र लैंगिक हिंसा न्यूनीकरणलाई मुख्य प्राथमिकता दिने प्रतिबद्धता व्यक्त गरे। उनले भने, “अबकाे कार्यकाल समाजिक तथा मानवीय विकासतर्फ केन्द्रीत हुनेछ। विगतका तीन वर्षको अनुभवले मलाई यस क्षेत्रमा विशेष ध्यान दिनुपर्ने आवश्यकता महसुस गराएको छ।”
सञ्जालका अनुसार समाजमा देखिने भौतिक प्रगतिको चमकभित्र अझै पनि बालविवाह, जातीय विभेद, श्रमशोषण, र घरेलु हिंसाजस्ता समस्याहरू मौलाइरहेका छन्। यस्तो अवस्थामा सामाजिक रूपान्तरणका लागि स्पष्ट नीति र पर्याप्त बजेट नहुँदासम्म समतामूलक र हिंसाविहीन समाजको निर्माण सम्भव छैन।
त्यस्तै पिसविन नेपालमा कार्यरत रमा भण्डारी भन्छिन् ” दिपायल सिलगढी नगरपालिकामा सञ्जालको यो पहल केवल एक मागपत्रमा सीमित छैन—यो समतामूलक समाज निर्माणकाे लागि एक सशक्त आवाज हाे । लैङ्गकि हिंसाकाे अन्त्य गर्न सबै आ-आफ्नाे क्षेत्रकाट जागे लक्ष्यमा सहजै पुग्न सकिने छ।”
सञ्जालद्वारा प्रस्तुत मागपत्र
प्रतिक्रिया
सम्बन्धित खवर
